Stats NZ has a new website.

For new releases go to

www.stats.govt.nz

As we transition to our new site, you'll still find some Stats NZ information here on this archive site.

  • Share this page to Facebook
  • Share this page to Twitter
  • Share this page to Google+
Ko ētahi atu take e pā ana ki te hononga ki te marae tipuna

View this page in English

E tirotiro ana tēnei wāhanga ki ngā tātai pāpori, ōhanga, tatauranga iwi hoki e pā ana ki te tūhono o te Māori ki te marae tipuna.

I kitea i roto i ngā hua o Te Kupenga:

  • he paku nei te whanaungatanga o ngā take pāpori me te ōhanga ki te hononga ki te marae tipuna
  • he pānga o te taipakeke ki te haere ki te marae tipuna
  • ko ngā Māori whai tamariki ka nui ake te hiahia ki te haere atu ki te marae tipuna
  • ko ngā Māori he whānau nui tō rātau ka nui ake te haere atu ki te marae tipuna.

He paku nei te whanaungatanga o ngā take pāpori me te ōhanga ki te hononga ki te marae tipuna

E whakaatu ana ngā tātaritanga kāore he pānga nui o ngā pāpori me te ōhanga ki te hononga o te Māori ki tō rātau marae.

Ko ngā mea i whai pānga ko te taipakeke, whiwhinga moni ā-tangata, momo whānau, me te nui o te whānau.

Ko ngā tātai kāore i kitea he pānga nui ko te ira tangata, te tūnga hunga mahi, me te noho tāone, taiwhenua rānei.

He pānga o te taipakeke ki te haere ki te marae tipuna

O ngā tātai tatauranga iwi katoa, ko te taipakeke te whai pānga nui rawa atu ki te hononga ki te marae tipuna. I piki ngā haerenga atu o te tangata ki tōna marae i roto i ngā marama 12 kua pahure, me te nui o ngā wā i haere atu i roto i taua wā, ki te pakeketanga haere.

Ko te tikanga pea o tēnei nā te kaha ake o te hono o ngā Māori pakeke ake ki tō rātau ao Māori tēnā i ngā Māori rangatahi ake. Ko te tikanga ko te reo Māori te reo tuatahi o ngā Māori pakeke ake, he pai rawa atu, he pai rānei ki te kōrero Māori, he mōhio ki tō rātau iwi, me te tūhono hoki ki tō rātau marae tipuna hei tūrangawaewae – koinei katoa ngā take e pā ana ki te hāereere atu ki te marae tipuna.

Tirohia a Te Kupenga 2013 mō ētahi atu kōrero.

Ko te tikanga kua tae atu ngā Māori pakeke ake ki te marae tipuna

Neke atu i te haurua (52 ōrau) o ngā pakeke Māori 15–24 ngā tau kua tae atu ki tō rātau marae tipuna, ā, 28 ōrau i tae atu i roto i ngā marama 12 kua pahure. Ka whakatairitea ki te 71 ōrau o ngā pakeke Māori 55 ngā tau, neke atu rānei kua tae atu ki tō rātau marae tipuna, ā, 38 ōrau i tae atu i roto i ngā marama 12 kua pahure.

Ko te tikanga he nui ake ngā haerenga atu o ngā Māori pakeke ake ki tō rātau marae tipuna i roto i ngā marama 12 kua pahure tēnā i ngā Māori tamariki ake. O te hunga 55 ngā tau, neke atu rānei, 45 ōrau i tae atu ki tō rātau marae tipuna i ngā wā e ono, nui atu rānei i roto i ngā marama 12 kua pahure, tēnā i te 23 ōrau o te hunga 15-24 ngā tau.

Kauwhata 4

Kauwhata, Ko te haerenga ki te marae tipuna.

Engari, ko ngā Māori pakeke ake (55 ngā tau, neke atu rānei) kāore rātau i hiahia kia nui atu ngā haerenga atu ki tō rātau marae tipuna i roto i ngā marama 12 kua pahure – he haurua i te hiahia kia nui ake ngā haerenga atu, ā, ko tētahi haurua karekau. Ehara tēnei i te mea rerekē nā te nui ake o ā rātau mahi i tō rātau marae tipuna.

Ko ngā Māori 35–44 ngā tau te hunga i tino hiahia kia nui ake ngā haerenga atu, tata ki te rua hautoru (65 ōrau) i kī koinā tō rātau hiahia.

Te nui ake o ngā kanohi rangatahi i te marae

Ko ngā Māori 15–24 ngā tau te hunga kāore i tino tae atu ki tō rātau marae tipuna. Engari, i te mea koinei te ōwehenga nui rawa o te taupori Māori tēnā i ngā rōpū taipakeke ake, tokomaha ake rātau i tae atu ki tō rātau marae. O ngā tāngata 324,000 i tae atu ki tō rātau marae tipuna, e 75,000 (23 ōrau) he 15–24 ngā tau. Ka whakatairitea atu ki ngā Māori 55 ngā tau, neke atu rānei, he 21 ōrau (69,000) o rātau kua tae atu ki tō rātau marae tipuna.

Ko ngā Māori whai tamariki ka nui ake te hiahia ki te haere atu ki te marae tipuna

He pānga o te noho i roto i tētahi whānau whai tamariki me te piki haere o te tūhono atu ki te marae tipuna.

O ngā tokorua kāore he tamariki, e 60 ōrau i tae atu ki tētahi o ō rātau marae tipuna i tētahi wā i mua, ki te 65 ōrau o ngā whānau kotahi te matua.

Ko te tikanga ko ngā whānau whai tamariki i tae atu ki tō rātau marae tipuna i roto i ngā marama 12 kua pahure tēnā i te hunga kāore he tamariki. O ngā tokorua kāore he tamariki, 28 ōrau i tae atu ki tō rātau marae tipuna i roto i ngā marama 12 kua pahure, tēnā ki te 34 ōrau o ngā tokorua whai tamariki, me te 37 ōrau o ngā whānau kotahi te matua.

He nui ake te hiahia o ngā whānau kotahi te matua ki te hāereere atu ki tō rātau marae tipuna. E whakaatu ana ngā hua e 62 ōrau i hiahia ki te haere atu tēnā i te 57 ōrau o ngā tokorua kāore he tamariki.

Ko ngā Māori he whānau nui tō rātau ka nui ake te haere atu ki te marae tipuna

I roto i Te Kupenga kei te tangata anō tōna whakamārama mō te whānau. Kei roto pea ko te whānau ā-whakapapa, ngā hoa hoki/rānei, me ētahi atu.

Ko te nui rawa atu o te whānau o te tangata, ko te tikanga ka nui ake te hāereere atu ki tō rātau marae tipuna. Ko te ōwehenga o te hunga i tae atu ki tō rātau marae tipuna he 54 ōrau mō te hunga tokorima, iti ake rānei i roto i te whānau. Ka whakatairitea tēnei ki te 85 ōrau mō te hunga e 51, neke atu rānei i roto i te whānau.

Neke atu i te hauwhā (27 ōrau) o ngā Māori e rima, iti ake rānei i roto i te whānau i tae atu ki tō rātau marae tipuna i roto i ngā marama 12 kua pahure, ā, neke atu i te haurua (55 ōrau) o te hunga e 21 ki te 50 i roto i te whānau i tae atu ki tō rātau marae tipuna.

Kauwhata 5

Kauwhata, Ngā haerenga ki te marae tipuna i ngā marama 12 kua pahure.

He hauwhā o ngā Māori e rima, iti ake rānei i roto i te whānau i tae atu ki tō rātau marae tipuna i ngā wā e ono, neke atu rānei i roto i ngā marama 12 kua pahure. Ka whakatairitea tēnei ki te 40 ōrau o ngā Māori e 51, neke atu rānei i roto i tō rātau whānau.

  • Share this page to Facebook
  • Share this page to Twitter
  • Share this page to Google+

Ka tutuki rānei ō wawata i te mōhiohio o tēnei whārangi?


Top
  • Share this page to Facebook
  • Share this page to Twitter
  • Share this page to Google+