Stats NZ has a new website.

For new releases go to

www.stats.govt.nz

As we transition to our new site, you'll still find some Stats NZ information here on this archive site.

  • Share this page to Facebook
  • Share this page to Twitter
  • Share this page to Google+
Ko ngā take ahurea me te hononga ki te marae tipuna

View this page in English

E titiro ana tēnei wāhanga ki ngā take ahurea e pā ana ki te hononga ki te marae.

I kitea i roto i ngā hua o Te Kupenga:

  • he kaha te hononga i waenga i te tūrangawaewae me te haere ki te marae tipuna
  • te whai pānga o te tatanga ki te marae tipuna ki ngā haerenga o nā tata nei
  • te pānga o te mōhio ki te pepeha ki te marae tipuna
  • te pānga o te reo Māori ki te haerenga atu ki te marae tipuna
  • te whai wāhi o te mātauranga reo Māori ki te hononga ki te marae tipuna.

I te mea ko te marae tipuna tētahi o ngā pou o te ao Māori, ehara ēnei kitenga i te mea hou. Engari, he tautoko kē i te whakaaro he maha ngā āhuatanga o te ahurea, me te aha he uaua ki te wehewehe i ōna wāhanga.

He kaha te hononga i waenga i te tūrangawaewae me te haere ki te marae tipuna

Ko te whai tūrangawaewae he wāhi tūnga, he kāinga hoki e hono ana i a koe ki taua wāhi – mō te nuinga o ngā Māori ko te marae tipuna tēnei. Mā te whai marae tipuna hei tūrangawaewae ko te tikanga ka nui ake te haere a te tangata ki tōna marae tipuna.

Neke atu i te haurua (54 ōrau), 282,000 ngā pakeke Māori rānei i kī ko tō rātau marae tipuna tō rātau tūrangawaewae ki a rātau.

Tata ki te katoa (94 ōrau) o ngā Māori he marae tipuna tō rātau hei tūrangawaewae i tae atu ki tētahi o ō rātau marae tipuna i mua. Ka whakatairitea tēnei ki te 25 ōrau o rātau kāore i whakapono ehara ō rātau marae tipuna i tō rātau tūrangawaewae.

Neke atu i te haurua (57 ōrau) o ngā Māori he marae tipuna tō rātau hei tūrangawaewae i tae atu ki tō rātau tipuna marae i roto i ngā marama 12 kua pahure. O taua hunga, 61 ōrau i tae atu i ngā wā neke atu i te toru, tae atu ki te 10 ōrau e 21 neke atu rānei ngā haerenga atu.

He rerekē tēnei ki te 6 ōrau anake o rātau kāore he marae tipuna hei tūrangawaewae i tae atu ki tō rātau marae tipuna i roto i ngā marama 12 kua pahure, ā, ko te nuinga (69 ōrau) kotahi, e rua rānei ngā haerenga atu i ngā marama 12 kua pahure.

Kauwhata 1

Kauwhata, Nga haerenga ki te marae tipuna i nga marama 12 kua pahure.

O ngā Māori ko te marae tipuna tō rātau tūrangawaewae, 63 ōrau i te hiahia kia nui ake ngā haerenga atu ki tō rātau marae tipuna. Iti ake i te haurua (44 ōrau) o ngā Māori kāore he marae tipuna hei tūrangawaewae mō rātau i te hiahia.

Te whai pānga o te tatanga ki te marae tipuna ki ngā haerenga o nā tata nei

Ko ngā Māori i noho tata ki te marae i kī rātau koinā tō rātau tūrangawaewae (i roto i te 30 meneti te tawhiti i runga waka) ko te tikanga kua tae atu i roto i ngā marama 12 kua pahure, ā, he nui ake te haere atu tēnā i te hunga kāore i noho tata mai.

E toru hauwhā o ngā Māori 71,500 e noho tata ana ki tō rātau marae tūrangawaewae i tae atu ki reira i roto i ngā marama 12 kua pahure. Tata ki te 80 ōrau o ēnei i tae atu i ngā wā nui ake i te toru i roto i taua wā, tae atu ki te 22 ōrau i tae atu i ngā wā neke atu i te 21.

O te hunga kāore i te noho tūtata ki tō rātau marae tipuna i whakaarohia e rātau koinā tō rātau tūrangawaewae, 27 ōrau i tae atu i roto i ngā marama 12 kua pahure. Tata ki te haurua (52 ōrau) i tae atu i ngā wā neke atu i te toru, tae atu ki te 4 ōrau anake e 21 ngā haerenga atu, nui atu rānei.

Ko ngā Māori kāore i te noho tūtata ki tō rātau marae tūrangawaewae ko te tikanga ka hiahia rātau kia nui ake ā rātau haere atu tēnā i te hunga e noho tūtata ana. O te hunga kāore i te noho tūtata, 60 ōrau i te hiahia kia nui ake ngā haerenga atu tēnā i te 55 ōrau o te hunga e noho tūtata ana.

Te pānga o te mōhio ki te pepeha ki te marae tipuna

Ko ngā Māori e mōhio ana ki ngā wāhanga katoa o ā rātau pepeha (iwi, hapū, maunga, awa, marae, tīpuna, waka) ko te tikanga kua tae atu ki tō rātau marae tipuna tēnā i te hunga he iti ake te mōhio ki ngā wāhanga o ngā pepeha. Ko te tikanga kua tae atu anō rātau inā tata nei, he nui ake te tae atu, ā, he hiahia anō hoki kia nui ake te haere atu.

Neke atu i te hautoru (39 ōrau), 205,500 o ngā pakeke Māori he mōhio ki ēnei āhuatanga katoa o tā rātau pepeha.

Ko ngā Māori i te mōhio ki te katoa o ā rātau pepeha e rua whakareanga ake te tūpono kua tae atu ki tō rātau marae tipuna tēnā i te hunga he iti ake te mōhio (95 ōrau ki te 41 ōrau). Ko te ōwehenga o rātau kua tae atu ki tō rātau marae tipuna i roto i ngā marama 12 he 63 ōrau, tēnā i te 15 ōrau anake o te hunga he iti ake te mōhio.

O ngā Māori i te mōhio ki ā rātau pepeha, 37 ōrau i tae atu ki tō rātau marae tipuna i ngā wā e ono, nui atu rānei i roto i ngā marama 12 kua pahure, tēnā i te 15 ōrau o te hunga he iti ake te mōhio.

Ko te nuinga o ngā Māori (65 ōrau) i te mōhio ki ā rātau pepeha i te hiahia kia nui ake ā rātau haerenga atu ki ō rātau marae tipuna. Ahakoa he iti noa te rerekē mō ngā Māori he iti ake te mōhio ki ā rātau pepeha – 52 ōrau i te hiahia kia nui ake te haere atu, ā, 48 ōrau kāore i te hiahia kia nui ake te haere.

Te pānga o te reo Māori ki te haerenga atu ki te marae tipuna

Ko ngā Māori ko te reo Māori tō rātau reo tuatahi (ko te reo tuatahi i akona ai i te tamarikitanga, ā, e mārama tonu ana) ko te tikanga ka kaha ake te hono tonu ki tō rātau marae tipuna tēnā i te hunga he reo Ingarihi te reo tuatahi.

O ngā Māori 8,000 ko te reo Māori tō rātau reo tuatahi, 92 ōrau i tae atu ki tō rātau marae tipuna i mua, ā, 69 ōrau i tae atu i roto i ngā marama 12 kua pahure. Ka whakatairite tēnei ki te 60 ōrau me te 31 ōrau o te hunga ko te reo Ingarihi te reo tuatahi.

Tata ki te haurua (45 ōrau) o ngā Māori ko te reo Māori tō rātau reo tuatahi i tae atu ki tō rātau marae tipuna i roto i ngā wā e ono, neke atu rānei i roto i ngā marama 12 kua pahure, tae atu ki 20 ōrau o te hunga i tae atu i ngā wā 21, neke atu rānei. O te hunga ko te reo Ingarihi tō rātau reo tuatahi, 29 ōrau i tae atu i ngā wā e ono, neke atu rānei.

He hononga o te tino whai wāhi atu ki te marae tipuna ki te matatautanga ki te reo Māori

Tata ki te katoa (95 ōrau) o ngā Māori 50,500 he pai rawa atu, he pai rānei te kōrero Māori kua tae ki tō rātau marae tipuna i mua. O tēnei rōpū, tata ki te toru hauwhā (73 ōrau) i tae atu i roto i ngā marama 12 kua pahure. He rerekē tēnei ki te 45 ōrau o ngā Māori 257,000 kāore e nui atu ō rātau mōhio ki ētahi kupu noa iho, ētahi kīanga rānei kua tae ki tō rātau marae tipuna i mua, ā, 18 ōrau i tae i ngā marama 12 kua pahure.

Ko te tikanga he nui ake ngā haere atu a te hunga matatau i ērā kāore i te tino matatau. Tata ki te haurua (49 ōrau) o te hunga he pai rawa atu, he pai rānei te kōrero, e ono ā rātau haerenga, neke atu rānei i te tau kua pahure. Ka whakatairitea tēnei ki te 17 ōrau o te hunga kāore e nui atu ō rātau mōhio ki ētahi kupu noa iho, ētahi kīanga rānei.

Kauwhata 2

Kauwhata, Ko te haerenga ki te marae tipuna.

Tata ki te haurua (51 ōrau) o ngā Māori kāore e nui atu ō rātau mōhio ki ētahi kupu noa iho, ētahi kīanga rānei he hiahia kia nui ake te haere atu ki tō rātau marae tipuna. Ka whakatairitea tēnei i te 64 ōrau o te hunga he nui atu ō rātau mōhio ki ētahi kupu noa iho, ētahi kīanga rānei.

Te whai wāhi o te mātauranga reo Māori ki te hononga ki te marae tipuna

He pānga o te whakauru ki te mātauranga reo Māori (arā ko te kōhanga reo, kura kaupapa Māori, wharekura, wānanga rānei) ki te kaha o te hono atu ki te marae tipuna.

Neke atu i te 90 ōrau o ngā pakeke Māori i whakauru atu ki te kōhanga reo me te kura kaupapa / wharekura i tae atu ki tō rātau marae tipuna i mua. Ka whakatauritea tēnei ki te 55 ōrau o te hunga kāore rawa i whakaurua ki tētahi momo mātauranga reo Māori. Ko te tikanga e rua whakareanga ake te tūpono kua tae atu ki tō rātau marae i roto i ngā marama 12 kua pahure tēnā i te hunga kāore i whakaurua atu.

Kauwhata 3

Kauwhata, Ko te haerenga ki te marae tipuna i te ngā marama 12 kua pahure.

Ko ngā Māori i whakauru atu ki ngā wānanga anake ko rātau te hunga i kaha te haere atu ki te marae tipuna i roto i ngā marama 12 kua pahure – 71 ōrau i tae atu i ngā wā e toru, neke atu rānei, me te 17 ōrau i haere atu i ngā wā 21, neke atu rānei. Ā, neke atu i te haurua (53 ōrau) o ngā Māori kāore i whakauru atu ki tētahi mātauranga reo Māori i tae atu i ngā wā e toru, neke atu rānei, tae atu ki te 5 ōrau i tae atu i ngā wā neke atu i te 21.

Ko ngā Māori i whai wāhi atu ki tētahi mātauranga reo Māori ko te tikanga ka nui ake te hiahia ki te haere atu ki tō rātau marae tipuna tēnā i te hunga kāore i whakauru atu ki tēnei momo mātauranga. O ngā Māori i whakautu atu ki te kōhanga reo me te kura kaupapa / wharekura, 67 ōrau i hiahia kia nui ake ngā haerenga atu ki tō rātau marae tipuna, tēnā i te 56 ōrau o rātau kāore i whakauru atu ki te mātauranga reo Māori.

  • Share this page to Facebook
  • Share this page to Twitter
  • Share this page to Google+

Ka tutuki rānei ō wawata i te mōhiohio o tēnei whārangi?


Top
  • Share this page to Facebook
  • Share this page to Twitter
  • Share this page to Google+